Хаҡлыҡ – халыҡ араһында

Дүртөйлө районы хакимиәте вәкилдәре халыҡ менән осрашыуҙарҙы дауам итә. Яңыраҡ Күкҡуян ауыл биләмәһендә граждандарҙың йыйыны үтте.

Ауыл биләмәһендә биш тораҡ иҫәпләнә: Күкҡуян, Ивачев, Манъяҙыбаш, Яңы Урал, Урманаҫты ауылдары. Һәр береһенең үҙенә генә хас көнүҙәк мәсьәләләре, етәкселәргә һорауҙары, тәҡдимдәре етерлек. Йәнле һөйләшеү ике яҡ өсөн дә файҙалы. Ауыл биләмәһе хакимиәте башлығы Салауат Ислаҡаев халыҡты борсоған һорауҙарға туҡталды, киләсәктә башҡарылаһы эштәрҙе күҙалланы.

Хәҙерге осорҙа ауыл кешеләренең биләмәне төҙөкләндереү буйынса үҙҙәренең төрлө проекттарҙа, программаларҙа әүҙем ҡатнашыуы мөһим. Был йәһәттән күкҡуяндар күптәргә өлгө булырлыҡ. Ике йыл рәттән улар “Урындағы башланғыстарҙы яҡлау” программаһы буйынса конкурста еңеү яуланы. Һөҙөмтәлә янғын һүндереү комплексына эйә булдылар, Ивачев мәктәбе ҡыйығы ремонтланды. Урманаҫты халҡы ла тик ятмай, 2017 йылда “Тере шишмәләр” район конкурсында гран-при яулап, 35 мең һум аҡсалы булды. Былтыр “Берлектә – көс” программаһы менән “Иң яҡшы муниципаль ғәмәл” конкурсында ҡатнашып, күкҡуяндар трактор алды.

Район хакимиәте башлығы вазифаһын башҡарыусы Риф Йосопов, уның урынбаҫарҙары һәм белгестәр ауылдарҙа ялған араҡы һатыуға ҡаршы күмәкләп көрәшергә саҡырҙы. Йәмәғәтселек көсө менән генә айыҡ тормошҡа аяҡ баҫыу, эскелекте кәметеү мөмкинлеген граждандарҙың күпселеге аңлай. Эскелек сәскә атҡан ерҙә янғын хәүефе лә арта. Ғөмүмән, янғынға ҡаршы көрәш саралары тураһында ауыл йыйынында һүҙ күп булды.

Ауыл халҡының да етәкселәргә әйтер һүҙе, теләге етерлек: ҡаты коммуналь ҡалдыҡтарҙы сығарыу, һаулыҡ һаҡлау һәм башҡа көнкүреш мәсьәләләре күтәрелде. Район етәксеһе кешеләргә тынғыһыҙ, егәрле хеҙмәттәре өсөн рәхмәт белдереп, киләсәктә лә бөтә эште бергәләп кәңәшләшеп башҡарасаҡтарына ышандырҙы.