Италмаҫта хәл итмәҫтәй проблемалар булмаҫ

2011 йылда Шүдек ауыл биләмәһен үҫтереү, төҙөкләндереү буйынса генераль план ҡабул ителгәс, йәштәр күпләп бында төпләнә башлаған. Етмәһә, Яңауыл районы хакимиәте лә биҫтәне үҫтереү буйынса байтаҡ эш башҡара.

Италмаҫ биҫтәһендә бер нисә урам барлыҡҡа килгән. Күп балалы, торлаҡ шарттарын яҡ­шыртыуға сиратта торған ғаиләләр был биҫ­тәнән ер майҙаны алып, йорттар һала, гараж, мунса күтәрә. Әле 115 участок бүленеп, уларҙа 405 кеше йәшәйәсәк. Бөгөн биҫтәлә 40 йәш ғаилә өй туйлаған да инде.

Яңы биҫтәлә 60 урынға иҫәпләнгән заманса балалар баҡсаһы төҙөлә. Объектты күптән инде төҙөлөш баҙарында абруй яулаған “Геострой” яуаплылығы сикләнгән йәмғиәте төҙөй. Әле бында төҙөлөш ҡыҙыу темпта бара. Балалар баҡсаһынан тыш, ауылда заманса ҡаҙанлыҡ һалына, мәҙәниәт һәм ял паркы, стадион буласаҡ. 6375 метр оҙонлоғондағы һыу үткәргес тә халыҡтың көнкүрешен яҡшыртасаҡ. Ҡыҫҡаһы, биҫтәлә бөтә социаль инфраструктура ҡаралған.

– Биҫтәнең Яңауыл ҡалаһына яҡын булыуын иҫәпкә алғанда, киләсәктә күп кенә йәш ғаиләләр бында төпләнер, тигән өмөттәбеҙ. Таҙа һауа, йәшеллек, ҡаланыҡынан һис тә ҡалышмаған уңайлы шарттар, әйҙә, рәхәтләнеп йәшә, – ти район хакимиәте етәкселеге.