Спорт менән шөғөлләнеүселәр артҡан

Рәсәй Хөкүмәте туғыҙ миллиард һумдан ашыу аҡсаны модулле спорт залдары һәм “аҡыллы” спорт майҙансыҡтары төҙөлөшөнә йүнәлтәсәк. Был хаҡтағы ҡарарға Рәсәй Федерацияһы Хөкүмәте Рәйесе Михаил Мишустин ҡул ҡуйған.

Эш “Физик культура һәм спорт” дәүләт програм­ма­һына ҡараған “Бизнес-спринт (Мин спортты һай­лайым)” яңы федераль проекты сиктәрендә атҡары­ласаҡ. Хөкүмәттең аҡсалата ярҙамы һөҙөмтәһендә 80-дән ашыу спорт залы һәм 250-нән ашыу “аҡыл­лы” спорт майҙансығы барлыҡ­ҡа килә­сәк. Бында заманса, яҡшы йыһаз­лан­дырылған, һәр килгән кеше шәхси кү­нек­мәләрен планлаштырыу мөмкин­леген булдыра ал­һын өсөн интернетҡа тоташ­тырылған урындар буласаҡ.

Өс йыл эсендә илдең 84 төбәге 20– 100 миллион һумлыҡ күләмдә субсидия аласаҡ. 2022 йылда – 2,4 миллиард һум, 2023 йылда – 3,3 миллиард һум, 2024 йылда 3,4 миллиард һум аҡса бүленәсәк.

“Бизнес-спринт (Мин спортты һайлайым)” яңы федераль проекты Рәсәй Спорт министрлығы тарафынан 2030 йылға тиклем илдең социаль-иҡтисади үҫешенең стратегик баш­лан­ғыстары составында эшләнгән. Проект дәүләт һәм шәхси партнерлыҡ сик­тәрендә әүҙем физик культура һәм спорт мөхитен бул­дырыуҙы күҙаллай. Киләһе һигеҙ йылда, инвесторҙарҙы ҡалаларға һәм ауылдарға йәлеп итеп, физик культура һәм спорт инфраструктуралары эргәлә генә булды­рыласаҡ, тип көтөлә. Әйт­кәндәй, 2021 йылда Өфөлә физик культура һәм спорт менән даими шөғөлләнеү­селәр һаны 50,7 процентҡа еткән. Шулай итеп, әүҙем һәм сәләмәт тормош алып барыусылар һаны, алдағы йыл менән сағыштырғанда, 54 мең кешегә артҡан. Был мәғлүмәттәр менән Өфө ҡалаһы хакимиәтенең Физик культура һәм спорт идара­лығы рәйесе Егор Сорокин былтырғы һөҙөмтәләр тура­һында һүҙ барған кәңәш­мәлә таныштырған.

– Рәсәй Президенты, 2030 йылға илдә физик культура һәм спорт менән системалы рәүештә шөғөл­ләнеүсе граждандар һаны 70 процентҡа етергә тейеш, тине. Беҙ ҡуйылған маҡсатҡа өлгәшеү өсөн эштең бер нисә өҫтөнлөклө йүнәлешен бүләбеҙ, –  тип белдергәйне Егор Сорокин.

Рәсәй Президенты Владимир Пу­тин­дың “май” указдарына ярашлы раҫ­ланған “Демография” милли проекты сиктәрендә ҡуйылған маҡсат­тар­ға ярашлы, ха­лыҡ­ты һаҡлау, ке­ше­ләрҙең һаулығы һәм именлеге, 2030 йылға ғүмер оҙонлоғон 78 йәшкә тиклем арттырыу – өҫтөнлөклө бурыстар.

Айһылыу НИЗАМОВА