Ҡарай ҙа алмаҫбыҙмы икән ни?

Спорттың ябай өлкә түгел, ә милли мөнәсәбәттәргә, эшлекле даирәгә, ижтимағи мөхиткә, ғөмүмән, йәшәйешебеҙгә ыңғай йоғонто яһаған үҙенә күрә бер ҡеүәтле көс икәнлеген һәммәбеҙ белә. Өҫтәүенә, спорт һәр саҡ беренсе булырға, үҙ-үҙеңә ышанырға һәм ысын шәхес тәрбиәләргә ярҙам итә. Был иһә – һәммәһе өсөн мөһим һыҙаттарҙың береһе. Хәҙер физик культура һәм спорт менән шөғөлләнмәгән, төрлө эстафеталарҙа ҡатнашмаған кеше бик һирәк. Тап ошондай саралар барыбыҙҙы ла сәләмәт тормош алып барырға өндәй.

Тағы шуны билдәләп үтергә кәрәк: һуңғы йыл­дарҙа Башҡортостанда спортҡа мөнәсәбәт яҡшыр­ғандан-яҡшыра, төрлө спорт объекттары барлыҡ­ҡа килә. Бөтә Рәсәй “Спорт менән йәшәйем” форумында, мәҫәлән, Рима Баталова исемендәге Спорт әҙерлеге үҙәге илебеҙҙең иң яҡшы спорт ҡоролмаһы тип танылды. 2024 йылға тиклем барлыҡ район үҙәктәрен бассейнлы физкультура-һауыҡтырыу үҙәктәре менән тәьмин итеү бурысы ҡуйыл­ған. Уларҙа буласаҡ чемпиондар әҙерләнәсәк, балаларҙың һаулығы нығытыласаҡ.

– Донъя кимәлендәге спорт сараларының Баш­ҡортостанда үткәрелеүе барлыҡ спорт һөйөүсе­ләрҙең, көйәрмәндәрҙең иғтибарын республикаға йүнәлтә. Өфөлә йәш үҫ­мерҙәр араһында ойошто­ролған Көрәш буйынса донъя беренселегендә дө­йөм команда иҫәбе буйынса Рәсәй еңеү яуланы – спорт­сыларыбыҙ туғыҙ алтын, ике көмөш һәм һигеҙ бронза миҙалға лайыҡ булды. Шу­ныһы үҙенсәлекле: бындай донъя беренселеге иле­беҙҙә беренсе тапҡыр ойош­торолдо. Токио ҡала­һында үткәрелгән ХХХII йәйге Олимпия уйындарында республикабыҙҙан биш спортсы – Аделина Заһи­ҙуллина, Тимур Сафин, Алһыу Минәжева, Александр Сергеев һәм Варвара Баранова – үҙ көсөн һынап ҡараны. Яҡташтарыбыҙ фехтование буйынса уңыш­лы сығыш яһаны. Әйткән­дәй, беҙҙә был спорт төрө менән меңгә яҡын бала шөғөлләнә. Фехтование бигерәк тә Өфө һәм Нефтекама ҡалаларында үҫеш­кән. Олимпиадала, фехтование буйынса ярыштарҙа, Рәсәй йыйылма командаһы иҫәбендә олимпия чемпионы тип танылған Аделина Заһиҙуллина – Дуҫлыҡ орденына, ә көмөш миҙал хужаһы Тимур Сафин I дәрәжә “Ватан алдындағы ҡаҙаныштары өсөн” орде­нының миҙалына лайыҡ булған ине.

Шулай итеп, спорт йәшәү рәүешен билдәләй, сәләмәт тормош алып барыуға өн­дәй. Ә һәр спортсыға төрлө ярыш-бәйгеләрҙә ҡатнашыу зарур. Тик бына хәҙер Рәсәй менән Белоруссияны Олимпия уйындарын күрһәтеүҙән дә тыйҙылар, тип хәбәр итте  Lenta.ru порталы. Ул Халыҡ-ара Олимпия коми­тетының был хаҡта иғлан итеүе тураһында яҙған. Шулай итеп, Рәсәй менән Белоруссия 2026 – 2032 йыл­дарҙа үткәреләсәк ярыш­тарҙы күрһәтәсәк илдәр исемлегенә индерелмәгән.

Айһылыу НИЗАМОВА