Хеҙмәт династияһын дауам итә

Был һөнәрҙе һайлауын абруйлы етәксе осраҡлы түгел тип иҫәпләй. Ирек Миңлевәли улы әйтеүенсә, ете йәштән үк ул элемтәсе булырға хыял­ланған. Ул осорҙа “хеҙмәт динас­тия­һы” тигән һүҙбәйләнештең мәғә­нәһен тулыһынса аңлап та етмә­гәндер, бәлки. Әммә яҡындарының элемтә тармағында эшләүе тормош юлын һайлауға, һис шикһеҙ, булышлыҡ иткәндер.

Ваҡыт үтеү менән хыялы нығына барған. Армия сафында хеҙмәт итеп ҡайтҡас, Ирек Ғәлимов Башҡорт АССР-ы Элемтә етештереү-техник идаралығының Өфөләге ҡала һәм ауыл телефон элемтәһе бүлегенә электромеханик булып эшкә урынлаша. Хеҙмәт баҫҡыстарының барыһын да үтә, институт тамамлай. Артабан Саҡмағош район элемтә узелы начальнигы итеп тәғәйенләнә.

Һуңыраҡ яҙмыш уны тағы ла Өфөгә алып килә. 11 йыл Өфө почтамтына етәкселек итә. Миллионлы ҡалалағы почта селтәренә идара итеү еңелдән булмағандыр. Әммә профессионализмы, ойоштороу һәләте, татыу коллектив респуб­ликалағы ҙур почта предприятиеһы начальнигына ҡуйылған бурыстарҙы уңышлы тормошҡа ашырырға булышлыҡ итә.

Тап ошо йылдарҙа Ирек Миңле­вәли улы “Рәсәй Федерацияһының элемтә оҫтаһы” һәм “Башҡортостан Республикаһының атҡаҙанған элем­тәсеһе” тигән маҡтаулы исемдәргә лайыҡ була. Һуңыраҡ уларға Почет грамотаһы һәм “Өфө ҡалаһына хеҙмәте өсөн” билдәһе өҫтәлә.

Бөгөн Ирек Ғәлимов етәкселе­ген­дә “Рәсәй почтаһы” филиалы бүлексәләре күләме буйынса илдә иң ҙур предприятие коллективы эшләй. Форсаттан файҙаланып, Ирек Миңлевәли улы тормошон элемтә тармағы менән бәйләгән барлыҡ коллегаларын һөнәри байрам менән ҡотлай. Беҙ ҡотлауҙарға ҡушылабыҙ, ә бөгөн юбилейын билдәләгән етәксегә бәхет, һаулыҡ, уңыштар, яратҡан эшендә өр-яңы ижади ҡаҙаныштар теләйбеҙ.