Тырыштар һөҙөмтәгә өлгәшә

Башҡортостандың Тәбиғәттән файҙаланыу һәм экология министрлығынан белдереүҙәренсә, әле Благовар, Благовещен, Иглин, Ҡырмыҫҡалы, Борай, Ҡалтасы, Мишкә, Тәтешле, Яңауыл, Дәүләкән, Шаран район­дарында һәм Октябрьский ҡалаһында көнүҙәк мәсьәләне хәл итеү яҡшыраҡ ойошторолған.

Мәҫәлән, территориаль схема­ға ярашлы, Благовар районында сүп-сарҙы йыйыу бурысы 1-се төбәк опе­раторының эшмәкәрлек төбәгенә – Өфө ҡала округының “Ҡаланы йыйыштырыу буйынса махсуслашҡан автомобиль хужа­лығы” муниципаль унитар пред­прия­тиеһына тапшырыл­ған. Төбәк операторы иһә районда ҡаты көнкүреш ҡалдыҡтары өлкәһендә эшләгән “Экологик технологиялар” предприятиеһы менән килешеү төҙөгән.

1 майға ҡарата райондағы 65 ауылдан сүп-сар даими сығарыла, йәғни 95 процентты солғап алғандар. Эш график буйынса ойошторолған: район үҙәгендә аҙнаһына – алты тапҡыр, ә ҡалған ауылдарҙа, кеше һанына ҡарап, бер-ике тапҡыр сығаралар. Дөйөм йыйылыштарҙа халыҡ менән килешеп, ҡаты көнкүреш ҡалдыҡ­тарын йыйыу урындарын билдә­ләгәндәр. Ошо маҡсатта файҙа­ланыласаҡ 400 урын һайланған. Әле ул майҙан­сыҡтарҙа 278 контейнер урынлаш­тырылған, тағы ла 109 һатып алы­насаҡ. Контей­нерҙар өсөн майҙансыҡ­тарҙы төҙөк­ләндереү эштәре дауам итә. Район төбәк операторына сүп-сарҙы күсереп тейәү өсөн ер участкаһын файҙаланыуға тапшырған.

– Хәл итәһе мәсьәләләр ҙә бар. Мәҫәлән, төбәк операторы махсус техника менән етерлек кимәлдә тәьмин ителмәгәнлеге тойола. Бынан тыш, район биләмәһендә полигон булмағас, ваҡытлыса һалыу пунктында йыйыл­ған сүп-сарҙы Өфө районындағы Черкассы ауылы эргәһендәге ҡыйлыҡҡа сығара­лар. Әле үк ваҡытлыса йыйыу пункты­ның тулыланыуы ҡаты ҡалдыҡ­тарҙы күмеү урынына сығарыуға ҡарағанда ике тапҡырға тиҙерәк бара.

Иғтибар талап иткән тағы бер мәсьәлә – ҡаты көнкүреш ҡалдыҡ­тары әйләнеше буйынса күрһәтел­гән хеҙмәт өсөн түләү базаһы белешмәләренең сифатын тәьмин итеү талап ителә. Уны хәл итеү өсөн район хакимиәте, төбәк ташыусы оператор, ЕРКЦ вәкил­дәре, ауыл биләмәләре башлыҡ­тары берлектә кәңәшмәләр үткәрә. Ҡулланыусылар реестрын һорап алдыҡ, әле белешмәләрҙе төҙәтеү эше ҡулдан алып барыла, – тип белдерҙе район хакимиәте белгестәре.

Башҡортостан Хөкүмәтенең 2018 йылдың 12 декабрендә раҫланған бойороғона ярашлы, “Ҡаты коммуналь ҡалдыҡтар әйләнешенең комплекслы системаһы” төбәк операторы Благовар районы биләмәһендә йылына 20 мең тонна сүп-сарҙы айырыу ҡеүәтенә эйә булған комплекс төҙөйәсәк. Был иһә ҡалдыҡтарҙы сортҡа айырыуға һәм полигонды ваҡытында бушатыуға булышлыҡ итәсәк.