Фаил Фәтхетдиновҡа – юғары награда!

Тейешле указ хоҡуҡи мәғлүмәт рәсми интернет-порталында баҫылып сыҡты. Документта билдәләнеүенсә, республика гәзите етәксеһе юғары награда менән Ватан киң мәғлүмәт сараларын үҫтереүҙәге ҡаҙаныштары өсөн бүләкләнә.

“Фаил Камил улы был бүләккә ысынлап лайыҡ. Ул “Ҡыҙыл таң” гәзите редакцияһына оҙаҡ йылдар һәм уңышлы етәкселек итә. Баҫма журналистары уҡыусылар менән бик күп һәм һөҙөмтәле эшләй. Төрлө ҡыҙыҡлы акциялар үткәрәләр. Оҙаҡ йылдар инде Бөйөк Ватан һуғышында юғалған һалдаттарҙы эҙләү буйынса эш алып баралар, һәм был проектты башлаусы – баш мөхәррир үҙе”, – тип әлеге ҡыуаныслы ваҡиғаға ҡарата фекерен белдерҙе Башҡортостан Журналистар союзының яуаплы секретары Мәүлиҙә Яҡупова.

Фаил Камил улын юғары наградаға лайыҡ булыуы менән ихлас ҡотлайбыҙ, артабан да уңышлы эшмәкәрлек, яңынан-яңы үрҙәр теләйбеҙ.