Төндә үлгән ҡатын ауырлы булған

Бөгөн төндә Белорет ҡалаһында үлемесле авария булыуы тураһында хәбәр иткәйнек инде.

"Daewoo Nexia" автомобилендәге водитель автозаправканан сыҡҡан саҡта "BMW 325" автомобиленә юл бирмәй һәм улар бәрелешә. Бәрелеш шул тиклем көслө була, хатта "BMW 325" моделле сит ил машинаһы янып китә.

"Daewoo Nexia" автомобиле рулендәге ҡатын һәләк булды. Уның ире һәм 12 йәшлек ҡыҙы дауаханаға оҙатылған. Шулай уҡ икенсе автомобилдәге 18 йәшлек пассажир ҙа дауаханаға эләккән. Әле шуныһы асыҡланды: рулдәге 38 йәшлек ҡатын ауырлы булған. Машиналар шул тиклем ныҡ бәрелешә, уның кәүҙәһен ҡотҡарыусылар килмәйенсә, алып сыға ла алмайҙар хатта.

Әле хәл буйынса тикшереү эше дауам итә.