Илмир, Ҡазанды яулап ҡайт!

Кисә “Ҡазан Арена” стадионында 45-се донъя WorldSkills стандарттары буйынса һөнәри оҫталыҡ чемпионаты асылды.

Чемпионатты асыу тантанаһында Рәсәй Хөкүмәте Премьер-министры Дмитрий Медведев ҡатнашты. Шулай уҡ Ҡазанға Башҡортостан Башлығы вазифаһын ваҡытлыса башҡарыусы Радий Хәбиров та барҙы.

Стадион сәхнәһендә Татарстандың билдәле артистары, Елка, Александр Панайотов, Ян Гэ һәм башҡа билдәле артистар сығыш яһаны. Тамашасылар онотолмаҫлыҡ шоу күрҙе, чемпионатта ҡатнашыусы-илдәр парадын, иҫ китмәле махсус эффекттар ҡараны.

Чемпионат йәштәрҙе хеҙмәт итеүгә дәртләндерә. Күптәребеҙ бынан өс-биш йыл элек халыҡ-ара кимәлдә үҙеңдең һөнәри бурыстарыңды башҡарып, профессионализмда ярышып булалыр, тип күҙ алдына ла килтерә алмай ине. Бөгөн донъяның 63 иленән меңдән ашыу йәш белгес Ҡазанда йыйылды. Йәшлек ул – инновациялар, эшкә һәм белем алыуға яңы ҡараштар осоро. Йәштәр өлкәнерәк, тәжрибәлерәк коллегаларының ярҙамына ла мохтаж. Был чемпионат уларға бик күпте бирәсәк.

Шулай итеп ярышта 63 илдән 1300 бәйгесе 56 компетенцияла көс һынашасаҡ. Ярыштар төрлө өлкәләргә ҡағыла: флористар, столярҙар, парикмахерҙар, икмәк бешереүселәр, машина ремонтлаусылар һәм башҡа һөнәр эйәләре алдынғылыҡ өсөн тырышасаҡ.

Чемпионатта Рәсәй йыйылма командаһы иҫәбендә Башҡортостан вәкиле лә ҡатнаша. Ул – Хәйбулла районында тыуып үҫеп, Сибай күп профилле профессиональ колледжында уҡып йөрөгән студент Илмир Сәйетбатталов. Илмир “Ташты архитектур эшкәртеү” компетенцияһында оҫталығын күрһәтәсәк.