Туйҙа сәскә урынына... канцелярия

Илдә матур ғына яңы модаға нигеҙ һалынып килә.

Туй үткәргәндә ҡайһы бер парҙар ҡунаҡтарынан сәскә гөлләмәһе урынына башҡа файҙалы бүләк һорай. Мәҫәлән, таныштарымдың күптән түгел булған бер туйында йомшаҡ уйынсыҡтар килтереүҙе үтенделәр. Ярайһы күп кенә йыйылған уйынсыҡтарҙы аҙаҡ балалар йортона алып барып етемдәргә бүләк иттеләр. Ҡайһылай шәп идея бит. Бер нисә көн тороп, аҙаҡ һулып ташланған гөлләмәгә ҡарағанда етемдәрҙе шатландырыу күпкә күңеллерәк.

Шулай уҡ бүләккә эт-бесәйҙәр өсөн аҙыҡ алырға һораусылар ҙа күбәйә башланы. Улар шулай уҡ ас йөрөгән йәнлектәрҙе һыйлай. Ә күптән түгел Анжелика менән Евгений исемле матур пар ҡунаҡтарынан сәскә урынына канцелярия тауарҙары килтереүҙе һораған. Ә туйҙан һуң уларҙы бүлеп, аҙ тәьмин ителгән ғаиләләрҙә тәрбиәләнгән балаларға бүләк иткәндәр. Мәктәп алдынан ҡайһылай яҡшы бүләк!

Социаль селтәрҙәрҙә был идеяны хуплаусылар байтаҡ. Бәлки, һеҙ ҙә берәйһенә тәҡдим итерһегеҙ?