Башҡортостан
-14 °С
Болотло
VKOKРУС
Бөтә яңылыҡтар
Йәмғиәт
22 Февраль , 13:27

Атай-әсәй эҙҙәренән...

Һаулыҡ һаҡлау – тормошобоҙҙағы иң кәрәкле һәм иң яуаплы өлкәләрҙең береһе. Аҡ халатлыларҙан тыш йәшәйешебеҙҙе күҙаллауы ла ауыр, сөнки улар – сәләмәтлегебеҙ һағында, хәҙерге ҡатмарлы осорҙа бигерәк тә уларҙың ярҙамына, ҡурсалауына мохтажбыҙ.

Һыҙланһаҡ, берәй еребеҙ ауырт­һа, дауаханаға йүгерәбеҙ. Тап медицина хеҙмәткәрҙәре ауыр минут­тарҙа ярҙамға килә һәм беҙҙе, яҡындарыбыҙҙы аяҡҡа баҫтыра, иртәгәһе көнгә өмөт уята.

Һаулыҡ һаҡлауҙың һәр тар­мағы ла ауыр, ҡатмарлы. Мәҫә­лән, травматология – медици­наның иң бо­ронғо йүнәлеше. Тап ошо тармаҡ та­биптары төр­лө имгәнеү-йәрәхәт­ләнеү­ҙәрҙе дауалау менән шөғөл­ләнә. Шуға стресҡа ҡаршы тора ал­ған, түҙемле, көслө рухлы кеше­ләр генә бында эшләй ала. Мәләүез үҙәк район дауаханаһы травматология бүлегенең беренсе категориялы табибы, травматолог-ортопед Ришат Юлбарисов – тап шун­дайҙарҙың бере­һе. Ул – сығышы менән Көйөр­гәҙе районының Мораптал ауылынан. Ришат Рәжәп улы бәлә­кәйҙән табип булырға хыя­ллан­ған. Был аңлашыла ла, сөнки уның ата-әсәһе ғүмере буйы һаулыҡ һаҡлау өлкәһендә эшләй.

– Бала сағым Мораптал участка дауаханаһы биләмәһен­дә үтте. Атайым баш табип йөгөн тарт­һа, әсә­йем шәфҡәт туташы булды. Улар өй­гә ҡайтһа ла, пациенттары ха­ҡында ғына һөй­лә­шә ине. Бәлки, шу­ғалыр ҙа мин табип булырға те­лә­гән­мен­дер, – ти Ришат Юлбарисов.

Әйткәндәй, уның атаһы Рәжәп Рамаҙан улы – СССР-ҙың һаулыҡ һаҡлау отличнигы, Башҡортос­тан­дың атҡаҙанған табибы, Салауат Юлаев ордены кавалеры һәм Кө­йөргәҙе районының почетлы гражданы.

Ришат Юлбарисов урау юлдар аша ғына медицинаға эләгә. Ул мәктәпте тамамла­ғандан һуң Башҡортостан дәүләт медицина институтына уҡырға инә алмай.

– Рус теленән диктантты наса­рыраҡ яҙҙым, – тип көлә хәҙер ир-уҙаман. Әммә егет бер ҙә төшөн­көлөккә бирелмәй, Тыу­ған ил алдындағы мөҡәддәс бурысын үтәргә әрмегә китә. Ты­мыҡ океан флотында өс йыл хеҙмәт итә Ришат Юлбарисов. Унан ҡайтҡас, эшселәр факультетында белем алып, Башҡорт­ос­тан дәүләт медицина институты студенты булып китә һәм алты йыл белем ала. Интернатураны ошо уҡ уҡыу йортоноң хирургия кафедраһында үтә. Тап бында Ришат Рәжәп улы травматология менән яҡындан таныша һәм артабан ғүмерен медицинаның ошо өлкәһе менән бәйләргә була. Аҙаҡ атаһының кәңәшен тотоп, Мәләүез үҙәк район дауаха­наһына эшкә урынлаша. Хәҙер травматология бүлегендә эшләүенә – 24 йыл.

Травматолог, хирург кеүек – бик яуаплы һөнәр, сөнки тап уға кеше үҙенең һаулығын, ҡайһы саҡта хатта ғүмерен ышанып тапшыра. Ә табиптың дөрөҫ дауалауына бик күп нәмә бәйле: йәрәхәттең нисек йүнә­леүе, аяҡ-ҡулдың тиҙ төҙәлеүе һәм башҡалар. Ришат Юлбарисов үҙ һөнәрен, ҡатмарлы булыуға ҡарамаҫтан, бик ярата, унһыҙ тормошоноң бер көнөн дә күҙ алдына килтермәй, һәр эште еренә еткереп, бар күңелен һалып баш­ҡара. “Пациенттарыма ярҙам итеү­ҙән ҡәнәғәтлек тойғоһо алам”, – ти ул.

Бөгөн Ришат Юлбарисов – Мә­ләүез районы һәм ҡала­һында бил­дәле табип. Уны бик күптәр белә һәм ихтирам итә. Үҙ коллективында ла Ришат Рәжәп улы абруй ҡаҙан­ған. Травматология бүлеге – уның икенсе “йорто”. Табип бөтә ваҡытын тиерлек тап ошонда уҙғара. Пациенттарын ул яҡшы белә: кем, ҡасан да­уаханаға эләккән, ниндәй ауырыу менән сирләй һәм башҡалар...

– Беҙгә мөрәжәғәт итеүселәр бигерәк тә ҡыш күп. Урамда тайып йығылып, йә аяғын, йә ҡу­лын һындыралар. Аҙна­һына уртаса алғанда һигеҙ операция эш­ләйбеҙ, – ти Ришат Юлбарисов.

Өҫтәүенә, әлеге пандемия осоронда аҡ халатлыларға айырыуса ауырға тура килә. Ришат Рәжәп улы, төп хеҙмәтенән тыш, йәмәғәт эштәре менән дә шөғөлләнергә өлгөрә. Ул – Мәләүез районының Айырым хәүеф подразделениеһы ветерандары ойошмаһы рәйесе.

Ватанды һаҡлаусылар көнө – бөтә көслө зат вәкилдәренең, би­герәк тә Тыуған илен һаҡлап ҡайт­ҡан ир-егеттәрҙең яратҡан байрамы. Ришат Юлбарисов өсөн дә 23 февраль – мөһим дата. Был көндә ул Тымыҡ океан флотында нисек матрос булып хеҙмәт итеүен хәтер­ләргә ярата. Ул – медицина хеҙмәте лейтенанты. Атаһы Рәжәп Рамаҙан улы ла Тольятти ҡалаһында хәрби табип булып хеҙмәт иткән. Ата­һынан күргән – уҡ юнған, тигәндәй, Ришат Юлбарисов та, быуын сыл­быр­ҙарын ялғап, ҡәҙерле кеше­һе­нең тормош юлын маяҡ итеп, яҙ­мыш ауыр­лыҡтарына бирешмәй, ғүмер даръялары буйлап алға ынтыла...

Фәимә ҒАЙСИНА.

Мәләүез ҡалаһы.

Читайте нас в