Пандемия янаһа ла...

Төҙөлөш эштәре менән шөғөлләнәм. Маҡсатым – яҡын арала үҙ йортомдоң ишеген асып инеү, ғаилә менән бергә иркен өйҙә йәшәү. Өҫтәүенә, үҙ ихатамда мунса-һарай булһа ине, тип хыялланам. Тик бына коронавирус инфекцияһының килеп сығыуы, уның йәшәйеше­беҙҙең төрлө тармаҡтарына тәьҫир итеүе күңелде борсой. Пандемия республикалағы төҙөлөш тармағына нисек йоғонто яһаны икән?

З. ӘЙҮПОВ.

Өфө ҡалаһы.

– Шуныһы һөйөнөслө: Башҡортос­тан Волга буйы федераль округында торлаҡты сафҡа индереү буйынса ли­дерҙарҙың береһе булып ҡала. “Баш­стат” мәғлүмәттәренә ҡарағанда, фи­нанс­лауҙың барлыҡ сығанаҡтары иҫә­бенә 2,6 миллион квадрат метр май­­ҙанлы 34,8 мең фатир сафҡа ин­гән. Күрһәткестең үҫеше, былтырғы йыл­дың ошо уҡ осоро менән сағыш­тырғанда, 24 процент тәшкил иткән.

Шулай итеп, Башҡортостан Волга буйы федераль округында беренсе урынды тотороҡло биләүен дауам итә. Рәсәй Федерацияһы төбәктәре араһын­да республикабыҙ элеккесә алтынсы урынды биләй.

– Пандемия сәбәпле, төҙөлөш тармағы өсөн айырым ҡатмарлыҡтар булһа ла, ҡуйылған маҡсаттарға өлгә­шергә генә түгел, маҡсатлы күрһәт­кес­тәрҙе һәм былтырғы ошо осор бил­дәләрен артығы менән үтәй алдыҡ, – тип хәбәр итте республиканың төҙөлөш һәм архитектура министры вазифаһын башҡарыусы Егор Родин. 2024 йылға республика – 2,950 миллион квадрат метрҙан, 2030 йылға 4 миллион квадрат метрҙан кәм булмаған торлаҡты сафҡа индереүҙе планлаштыра.

Шәхси торлаҡ төҙөлөшө һиҙелерлек үҫеш күрһәтеүен дауам итә. Барлыҡ сығанаҡтар иҫәбенә 2021 йылдың 11 айында, баҡсасылыҡ өсөн ер участкаларында төҙөлгән торлаҡ йорттарҙы иҫәпкә алып, 1,6 миллион квадрат метр торлаҡ файҙаланыуға индерел­гән. Был алдағы йылдың ғинуар – ноябре менән сағыштырғанда 18 процентҡа күберәк.

Берҙәм торлаҡ төҙөлөшө мәғлүмәт системаһы мәғлүмәттәренә ҡарағанда, Башҡортостанда 200-ҙән ашыу төҙө­лөшкә рөхсәт ғәмәлдә. Төҙөүселәр тарафынан дөйөм майҙаны 3,2 миллион квадрат метр булған 267 тирәһе йорт күтәрелә.

Әйткәндәй, Башҡортостанда тест рәүешендә “Стройпортал” эш башланы. Уның маҡсаты – башҡарма властың төбәк органдары, шулай уҡ уларға ҡараған дәүләт һәм муниципаль ойошмалар, инвесторҙар, төҙөүселәр, граждандар һәм республика биләмәһендәге төҙөлөш тармағы ойошма-предприятиелары һөҙөмтәлелеген арттырыу.

– Бөгөн “Стройпортал”дан инвестор­ҙар-төҙөүселәр ҡуллана ала. Унда ҡала төҙөлөшө тураһындағы мәғлүмәт­тәр һәм Башҡортостан Республикаһы ҡала төҙөлөшө эшмәкәрлеген тәьмин итеү дәүләт мәғлүмәт системаһы, төҙөлөш тармағында муниципаль хеҙмәттәрҙән файҙаланыу мөмкинлеге бар, – тип белдерҙе Егор Родин.

2022 йылда порталды функциональ йәһәттән яҡшыртыу эше дауам итәсәк. Әйткәндәй, “Стройпортал”да процедуралар калькуляторы, белем базаһы менән танышырға мөмкин. Уларҙа – ҡала төҙөлөшө тармағындағы көнүҙәк мәсьәләләр.

“Стройпортал” эшен яҡшыртыу маҡса­тында инвесторҙар-төҙөүселәр үҙ тәҡдимдәрен [email protected] электрон адресына ебәрә ала. Улар сервистарҙы ойошторғанда иҫәпкә алынасаҡ.

Айһылыу НИЗАМОВА