16 йыл гәзит-журнал донъяһында ҡайнай

Гәзит һәм журналдарҙағы мәғлүмәттәр  ташҡа баҫылған һымаҡ. Ҡулға тотоп уҡыуҙың үҙ тәме һәм кинәнесе бар,  һүҙенең көсө лә ҡеүәтлерәк. Ишембай почтамтының ваҡытлы матбуғатҡа яҙылыу бүлеге етәксеһе Инира Төхвәтуллина хәҙер 16 йыл дауамында ошо яуаплы бурысты башҡара.

– Эш еңелдән түгел. Халыҡ менән уртаҡ тел таба белеүҙе талап итә беҙҙең һөнәр. Урамда  китеп барғанда таныштарҙы осрат­һам, тәүҙә хәл-әхүәл һорашам, гәзиткә яҙылыуҙары менән ҡыҙыҡһына башлайым. Ун көнлөк акция ваҡытында арзанға яҙылыу мөмкинлеге тураһында ла иҫтәренә төшөрәм. Кешегә  әйтеп кенә ебәреү ҙә етә бит. Гәзит уҡыр­ға күнеккәндәр унан айырыл­майҙар. Үҙемә төбәп килеп  яҙылған оло йәштәгеләр байтаҡ ҡына. Бер ыңғай күңелдәрен бушатып сығып китә улар. Шуға һәр бер гәзит уҡыусыбыҙ беҙҙең өсөн ҡәҙерле, – тине Инира Сәхи ҡыҙы.

Шул уҡ ваҡытта ул китапҡа, ваҡытлы матбуғатҡа ҡыҙыҡһыныу­ҙың кешелә бала саҡтан һалыны­уын да билдәләп үтте:

– Минең атайым заманында уҡы­тыу­сы, ауыл Советы рәйесе булды. Беҙҙең йортҡа бик күп гәзит-журнал килә торғайны. Ун балалы күмәк ғаиләлә барыбыҙ ҙа  бәләкәйҙән матбуғат баҫмаларын уҡып үҫтек. Әле лә  гәзит алдырам. Ҡанға һең­гән ул ғәҙәт, тиһәк тә хата булмаҫ. 

Әлеге көндә ваҡытлы матбуғат баҫмаларына яҙылыу осороноң ҡыҙған мәле. Ишембай районында ла “Башҡортостан”ды  алдырыу­сыла­рыбыҙ байтаҡ. Был йәһәттән Этҡол, Скворчиха почта бүлексә­ләрендә эш йәнле барыуын белдек. Шул уҡ ваҡытта ҡала эр­гәһендәге Смаҡай ауылында ла  баҫмабыҙҙы алдырыусылар бай­таҡ.

Өйгә гәзит килһә, күңел кү­тәрелеп китә. Һәр кем уны иң тәү  ҡулға төшөрөргә тырыша. Көндәлек мәшәҡәттәргә сумып, һеҙ ҙә “Башҡортостан” гәзитенә яҙылырға онотоп ҡуймағыҙ.

Резеда ШӘҢГӘРӘЕВА.

Ишембай районы.