Тыуған көндә лә – сирлегә ярҙамға

Ниндәй генә заман булмаһын, фельдшер-акушерлыҡ пункты ауылда йәшәгән кешеләр өсөн төп медицина ярҙамы күрһәткән ойошмаларҙың береһе булып ҡала.

Фельдшерҙың эше еңелдән түгел: сабыйҙарҙы һәм ауыр сир­леләрҙе өй беренсә ҡарау, сир­ҙәрҙе иҫкәртеү өсөн тикшереүҙәр һәм медицина процедуралары –  барыһы ла сабырлыҡ, мәр­хәмәтлелек сифаттарын талап итә. Ҡырмыҫҡалы ауылынан фельдшер Зәкирә Абдуллинаның ошо һөнәр буйынса эшләүенә дүрт тиҫтә йылдан ашыу ғүмер үткән.

– Бар күңелеңде, көсөңдө һалып, ысын йөрәктән башҡаларға ярҙам иткәндә генә, фельдшер булырға мөмкин. Башҡаса бер нисек тә килеп сыҡмай, сөнки медицина ярҙамы һорап фельдшер-акушерлыҡ пунктына ғына түгел, өйгә лә киләләр. Хатта тыуған көнгә лә ҡарап тормай, бер тапҡыр юбилейым менән ҡотларға килгән ҡунаҡтарыма үҙҙәренә генә өҫтәл янында ҡалырға тура килгәйне, – тип һөйләй хәҙер Зәкирә Закир ҡыҙы.

...Ул бала сағынан яҙмышын медицина менән бәйләргә хыяллана, шуға Өфөләге 1-се медицина училищеһын тамамлай. Хәҙер был аҙымына һис үкенмәй, киреһенсә, тормошоноң ошондай изге һөнәр менән бәйле булғанлығына шатланып бөтә алмай. Әле кесе улы Филүстең ҡатыны – килене Физәлиәнең ҡасандыр үҙе белем алған медицина училищеһында уҡыуына ҡыуанысы сикһеҙ.

Әйткәндәй, ҡатынға өс улын яңғыҙына аяҡҡа баҫтырырға тура килә: 42 йәше тулғанда, ҡыҙға­нысҡа ҡаршы, ире Ғайса яҡты донъя менән хушлаша. Яҙмыш һынауҙарына, хеҙмәт ауырлыҡ­тарына бирешмәй, йәшәргә, эшләргә ынтыла ҡатын, шулай өс улын да ныҡлы аяҡҡа баҫтыра. Хәҙер Ильяс, Илдус һәм Филүс әсәһенең йөҙөнә ҡыҙыллыҡ килтермәҫкә, эштәрен намыҫ менән атҡарырға тырыша.

– Балаларымдың тормош юлдарынан намыҫлы атларға тырышыуы ҡыуандыра. Эшемә килгәндә, остазым Роза Дилмөхәмәтоваға рәхмәтем сикһеҙ: ул мине һөнәр нескәлектәренә өйрәтеп кенә ҡалманы, серҙәшем дә, терәгем дә булды. Санитарка Хөснә Ғөбәйҙуллина, шәфҡәт туташы Фәриҙә Ҡолоҡаева менән шул замандағы ауырлыҡтарға биреш­мәйенсә, эргә-тирә ауылдар халҡын хеҙмәтләндерә инек. Өҫтәүенә, ул ваҡытта транспорт юҡ, халыҡ һаны ла бер мең ярым тирәһе ине. Хәҙер беҙҙең ҡарамаҡта – 600 кеше, – ти фельдшер.

Бөгөн “Ашығыс ярҙам” машина­һының даими йөрөүе, әлбиттә, фельд­шерҙарҙың эшен күпкә еңе­ләйтә. “Прививкалар яһау, бер йәшкә тиклемге балаларҙың сәлә­мәтлеген даими тикшереү, диспансерлаштырыу һәм башҡалар – төп эшебеҙ хәҙер. Бригадалар менән диспансерлаштырыуға сығабыҙ, коронавирус ин­фекцияһына ҡаршы прививка яһайбыҙ”, – ти Зәкирә Абдуллина.

Фельдшерҙың ярҙамсыһы Алевтина Әмирова менән бергә эшлә­үенә ике тиҫтә йылдан ашыу ваҡыт үткән инде. Улар әйтеүенсә, фельдшер-акушерлыҡ пунктының эр­гәһендә генә модель китапхана, мәсет, балалар баҡсаһының урынлашыуы халыҡҡа ифрат  уңайлы.

– Медицина хеҙмәткәре кешене тыңларға әҙер, тик битараф ҡал­маҫҡа һәм ғәҙәти булмаған хәл­дәрҙә тиҙ ҡарар ҡабул итә белергә тейеш, – ти фельдшер менән уның ярҙамсыһы.

...Ҡайһы ваҡытта кешеләр үҙ сәләмәтлегенә һалҡын ҡарай. Улар табиптарға барырға һәм һаулығын һаҡлау сараһын күрергә ашыҡмай. Ундай хәл-шарттарҙа фельдшер үҙенең бөтә яуаплы­лығын аңлай һәм кешеләргә медицина тик­шереүҙәренең мөһим­леген аңла­тырға тырыша.

Ҡала еренән айырмалы, ауылда фельдшер – икеләтә ҙур яуап­лылыҡ талап иткән һөнәрҙәрҙең бе­реһе, сөнки, сер түгел, бер үк ва­ҡытта уларға педиатр ҙа, терапевт та, күҙ табибы ла булырға тура килә.

Айһылыу НИЗАМОВА

Ҡырмыҫҡалы районы