“Иҫке Айыу ҙа күңелгә бик яҡын”

Илеш районының Иҫке Айыу ауылында яңы модулле фельдшер-акушерлыҡ пункты асылыуына кем генә һөйөнмәгәндер! Иҫкеһендә һыу ҙа, канализация ла булмауы ҙур уңайһыҙлыҡтар тыуҙырған. Яңы медицина пунктын иһә бер ай эсендә ҡороп ултыртып, заманса ҡорамалдар менән йыһазландырыуҙары фельдшер Рәзилә Ғәзизованы ла таң ҡалдырған.

– Был ауылға килгәнемә 20 йыл ваҡыт үтеп тә киткән икән. Бөрө медицина учи­лищеһын тамамлап, тәүге аҙымдарымды ошонда башланым. Үҙем Иҫке Күктау ауылынанмын. Хәҙер Иҫке Айыу ҙа күңелемә бик яҡын, ошонда тормошҡа сыҡтым, ике ул тәрбиәләп үҫтерҙек. Ауылдың йылдар үткән һайын “ҡартая” барыуы ғына күңелде болоҡһотоп ҡуя. Ә көнкүреш шарттары күҙгә күренеп яҡшыра бара, – ти медицина пункты мөдире Рәзилә Фәйләс ҡыҙы.

Буш ятҡан урында ҡалҡып сыҡҡан фельдшер-акушерлыҡ пункты – хәҙер ауылдаш­тарҙың осрашыу урыны ла. Бында пациенттар өсөн көтөү, ҡабул итеү бүлмәләре, процедура, вакцина яһау кабинеттары булды­рыл­ған. “Яйлап өр-яңы ҡорамалдар алдыҡ. Уларҙың ҡайһы бер­ҙәре элек беҙҙә юҡ ине. Стерили­заторҙар, анализаторҙар, глюкометр­ҙар алынды, киҫкен осраҡтар өсөн дефибриллятор бар. 152 кешене, шул иҫәптән 27 баланы хеҙмәтләндереү бурысы тора. Бина ҡы­шын да йылы, электр мейестәре эшләй. Пациенттарҙы яҡшыраҡ хеҙмәтләндереү өсөн уңайлы шарттар ҙа артты”, – тип һөйөнә медицина хеҙмәткәре.

Рәзилә Фәйләс ҡыҙының медицина пунктына күрше генә йәшәүе лә уңайлы. Ауыл­даш­тарҙың тәүлектең теләгән ваҡытында ярҙам, кәңәш һорап мөрәжәғәт итеүенә ул күптән күнеккән. Өлкәндәрҙең өйөнә йөрөп, энә ҡаҙарға, кәрәк булғанда “Ашығыс ярҙам” саҡыртырға тура килә.

Андреевка табиплыҡ амбулатория­һы­нан да белгестәр килеп, халыҡты ҡабул итә. Ауырыуҙарҙың тарихы, тап­шырған анализдары, ниндәй вакцина яһа­тыуҙары компью­терҙа асыҡ күренеп тора. “Барыһы ла ус төбөндәге кеүек, кем­гә ниндәй ярҙам кәрәк булыуы бил­дәле. Коронавирус ныҡ баш ҡалҡытҡан осорҙа ПЦР анализдарын үҙебеҙ илттек, вакцина яһаныҡ, әле лә иҫкәртеү эшен дауам итәбеҙ”, – ти Рәзилә Ғәзизова.

Һуңғы осорҙа республикабыҙ райондарында, хатта элек медицина пункттары бөтөн­ләй булмаған  төпкөл ауылдарҙа тәүге меди­цина ярҙамының яҡынла­шыуын, яңы фельдшер-акушерлыҡ пункттарының асылыуын, күсмә мобиль пункттарҙың эшләүен, халыҡ­тың һөйөнөсөн барыбыҙ ҙа күреп торабыҙ. Бюджет ресурстарының иң ҙур өлөшө социаль өлкәгә һәм граждандарҙың тормош сифатын яҡшыртыуға йүнәлтелә. Һаулыҡ һаҡ­лау тармағы, финанс ҡатмарлыҡтарына ҡа­ра­маҫтан, үҫешеүен, нығыныуын дауам итә.

Динә АРЫҪЛАНОВА

Илеш районы.