Тәбиғәт һаҡсыһы ул

Һоҡланғыс кешеләр тураһында йышыраҡ яҙғы, уларҙы халыҡҡа күберәк күрһәтке килә. Матурлыҡ донъяны ҡотҡарыр, тиҙәр, ошоға өҫтәп, яҡшылар – донъя тотҡаһы, тип тә әйтер инем. Мәҫәлән, Айвар Сафин – шундай уңғандарҙың береһе. Учалы районының Өргөн ауылынан булған яҡташым билдәле урмансы, тәбиғәтте һаҡлау инспекторы Тәлғәт Мостафа улы Сафиндың ишле ғаиләһендә тыуған. Атаһы, ағайҙары Булат һәм Талха кеүек, Айвар ҙа урмансы һөнәрен һайлап, ғаилә династияһын уңышлы дауам итә.

Егәрле, йор һүҙле, кешеләр менән уртаҡ тел таба белгән егет коллективта тиҙ арала ихтирам яулай. Әлеге көндә ул Өргөн урмансылығында участка лесничийы булып эшләй.

– Учалы – урманға, күл­дәргә бай райондарҙың бере­һе, – тип һөйләй әңгәмәсем. – Беренсенән, нәҫелемдә урмансылар күп булғас, мин дә улар яратҡан һөнәрҙе үҙләш­терҙем. Икенсенән, Учалыла тыуып та урман­сылыҡ йүнә­лешендә эшләмә­һәм, яҙыҡ булыр һымаҡ. Тамсы ла үкен­мәйем, һөнәремде яратам.

Ирекһеҙҙән:

Тәбиғәттең матурлығы

Күңелде арбай, арбар.

Ерҙә гүзәллек тыуҙырып,

Бәхетле йәшә, Айвар! –

тип өндәшке килә.

Эш урынында хөрмәт ҡаҙа­ны­уынан тыш, Айвар Сафин  бынамын тигән ғаилә баш­лығы ла. Эргә-тирә­ләге генә тү­гел, ә тотош Учалы райо­нын­дағы иң сибәр ҡыҙҙы эләк­тергән – Иман­ғол ауылы һы­лыуы Лена Ғил­ма­новаға өйлә­неп, бик матур, өлгө­лө донъя кө­тәләр, өс ҡыҙ тәрбиәләп үҫтерҙеләр.

Айвар Тәлғәт улы әйте­үен­сә, эше­нә йүгереп барыусыны, йортона аш­ҡынып ҡайтыу­сыны бәхетлегә һанай­ҙар. Ул да иртән хеҙмәт иткән урынына ашыға, кис етеү менән өйө­нә йыйына башлай. Әҙ генә ваҡыт ара­уығында ҡыҙ­ҙарын, кәләшен һағынып та өлгөрә.

Ваҡыты булған сағында дуҫым Айвар ағас тамыр­ҙарынан төрлө һындар, һа­уыт-һаба эшләй, халыҡты ҡыуандыра. Ипле, матур хол­ҡо менән райондаштары ара­һында абруй яулаған класташым тураһында, мәңгелек урман һаҡсыһы ул, тиҙәр. Ошо әйтел­гәндәрҙә, ысынлап та, дөрөҫлөк ярылып ята.

 Рамай ҠАҺИРОВ

Учалы районы.