Яңы һулыш инде шишмәгә

Илһөйәрлек, Тыуған илеңә, йәнтөйәгеңә файҙа килтереү тойғоһо бөгөн айырыуса ныҡ баһаланған заманда халыҡ та берҙәмерәк була бара. Нуриман районына эш сәфәребеҙҙең төп маҡсаты ошондай замандаштарыбыҙ менән осрашыу ине.

Республикала иғлан ителгән Атайсалға файҙалы эштәр йылы һәм Башҡортостан Башлығы Радий Хәбиров башланғысы менән старт алған “Атайсал” проекты ла изге эштәргә этәргес бирә. Нуриман районында йәнтөйәгенең киләсәге өсөн битараф булмағандар аҙ түгел. Нимесләр ауылынан Әлфирә менән Әлфир Нурғәлиевтәр – ошондай замандаштарыбыҙ. Үке­нес­кә ҡаршы, беҙ барғанда ғаилә башлы­ғы эштә булып сыҡты. Ауыл шиш­мә­һенә яңы һулыш биреү өсөн башынан алып аҙағынаса йөрөгән Әлфирә Фоат ҡыҙы менән һөйлә­шеүебеҙ бынан ике йылға яҡын элекке ваҡиғаларҙан, шишмәне төҙөкләндереү ниәте барлыҡҡа килгән осорҙан, башланып китте. “Ватсап” мессенджерында ауыл­дың төркөмөн булдырыу ҙа яҡташ­тарын туплауҙы, үҙ-ара бәйләнештә булыуҙы маҡсат итеп ҡуя. Тәүҙә унда ете кеше ине, хәҙер уларҙың һаны 300-гә яҡынлай. Шишмәне төҙөкләндергәндә лә үҙ-ара бәйлә­нештә булыу өсөн ауылдың төр­көмө әһәмиәтле роль уйнай.

– Ауылда Мәсет күле бар. Кеше­ләр йорттарында ҡоҙоҡ ҡаҙытһа, күлдең һыуын да ҡулланалар. Ике йыл элек уның һыуы һайыға башланы. Унан һыу алыу ҙа ауырлашты. Быны күреп, ошо күлгә ҡойоусы тау шишмәһенең торошон яҡшыр­тыу, һыуын алыуға уңайлы итеп эшләү теләге барлыҡҡа килде. Был хаҡта ауылдаштар төркөмөнә яҙ­ҙым, һәм күптәр был фекеремде күтәреп алды. Тәүге маҡсат шишмә сыҡҡан ерҙе табыу ине. Был үҙе арыу ғына мәшәҡәттәр тыуҙырҙы. Сыҡҡан урынын таҙартып, юлын асып ебәргәйнек, шишмә тағы ла шәберәк ағып китте.

Артабан ауыл халҡы менән күмәкләп эшкә тотондоҡ. Тәүге си­рат­та төҙөлөш кәрәк-ярағы алыр өсөн аҡса йыйҙыҡ. Ауылдыҡылар ғына түгел, ситтә йәшәгән яҡташ­тарыбыҙ ҙа үҙ өлөшөн индерҙе. Барлыҡ эш өмә менән башҡа­рылды. Шишмә сыҡҡан урынды тейешенсә төҙөкләндереп, һыу алыуға уңайлы булһын өсөн торба һалып, ҙур эш башҡарҙыҡ, хатта кәртәләп, буяп та ҡуйҙыҡ.

Дөйөм эштә әүҙем ҡатнашҡан ауылдаштарымды ла билдәләп үткем килә. Улар – Рафаҡ Хәйрул­лин, Мөхәррәм Камалов, Фәнзил Шәйҙуллин, Илнар Ғәлимов, Илһам Нурисламов, Урал Вәлиев, Фәйрүзә менән Сәлих Исмәғилевтәр, Фәни­лә Насретдинова һәм башҡа­ларҙы телгә алырға мөмкин. Хатта 80 йәштән уҙған Мәсғүт Абдуллин да ситтә ҡалманы. Өләсәйҙәренә ҡунаҡҡа ҡайтҡан балалар ҙа ҡул­дарынан килгәнсә ярҙам итте. Эш башлағанда килеп сығырмы икән, тигән шик булһа ла, күмәк тырыш­лыҡ менән маҡсатыбыҙға өлгәштек, – тип һөйләне Әлфирә ханым.

Был һүҙҙәрҙә ауылдаштарының бер төптән булыуына рәхмәтле икәнлеге лә күренде. Шишмәнең тирә-яғын төҙөкләндереп кенә ҡалмағандар, һыуының сифатын да тикшерткәндәр.

Нимесләр ауылының йәнә бер хыялы бар – шишмәгә илткән юлға таш түшәтеү. Был маҡсаттарының да яҡын киләсәктә тормошҡа ашырына ышана улар.

Нимесләр ауылының шишмәһе­нең киләсәге өсөн янып-көйөп йөрөгән Әлфирә Фоат ҡыҙының был яҡтың килене икәнлеген бел­гәс, уға хөрмәтебеҙ тағы ла артты. Архангел ҡыҙын яҙмыш 1990 йылда ошо ауылға килтерә, һәм хәҙер инде оҙаҡ йылдар иренең тыуған ерендә төпләнеп ғүмер итәләр. Бергәләп өс бала тәрбиәләп үҫтер­гәндәр. Нуриман минең өсөн тыуған ерем һымаҡ ҡәҙерле, ти ул.

– Шишмәне яңыртҡас, әлбиттә, күңелдә ҙур ҡәнәғәтлек тойғоһо тыуҙы. Уның һыуын бигерәк йәйен күпләп алалар. Хатта күрше ауылдан да киләләр. Күмәкләп тотонған­ға, эшебеҙ ырамлы барҙы. Ғөмү­мән, Нимесләр ауылының кешелә­ре электән берҙәм. Ҙур эштәрҙе шу­лай өмә менән башҡаралар. Әле ауыл­дың ҡатын-ҡыҙҙары махсус хәрби операцияла ҡатнашҡан егеттәргә  ойоҡбаштар бәйләй. Бер партия йылы кейемдәр бәйләп тапшырҙыҡ та инде, – тип ауыл­даш­тары менән ғорурлығын йәшер­мәне ул.

Тыуған ерҙәренә ҡәҙер күрһәтеп, һаҡлап йәшәүҙәре менән өлгө була белгән Нимесләр ауылы уңғанда­рына изге эштәренең дауамлы булыуын теләйбеҙ.

Резеда ШӘҢГӘРӘЕВА