Һауаны еҫләнгән балыҡ бысрата

Өфө эргәһендәге Иҙәк йылғаһында күпләп балыҡ ҡырыла. Был хаҡта социаль селтәрҙәрҙә урындағы халыҡ хәбәр итә. Улар әйтеүенсә, бер нисә көн элек кенә йылға тап-таҙа булған, унан болғансыҡҡа әүерелгән, хәҙер иһә балыҡ һәләк була башлаған.

– Йылға Өфөнөң һыу алыу ҡоролмаһына ҡушыла. Был хәлдең эҙемтәһе ниндәй булырын Алла ғына белә, – тип көйәләнә урындағы халыҡ.

Әйткәндәй, ошоға оҡшаш хәл июль башында Шишмә районында теркәлгәйне. Унда йәшәүселәр боҙолған балыҡ еҫе һауаны бысратыуға зарланғайны.