Байбаҡтар яҡлауға мохтаж

Бишбүләк яҡтарында байбаҡтарҙы ҡәҙерләйҙәр. "Баймаҡтан килеп еткәнсе бер хәрефен алмаштырған йәнлектәр" тип тә шаярталар.

Билдәле фотограф Станислав Шахов йыл да ваҡыт табып байбаҡтарҙы фотоға төшөрөргә бара икән.

• Был фотосессиялар бик ҡыҙыҡлы килеп сыға. Байбаҡтарҙың тышҡы ҡиәфәте бик уҫал: ҡараштары – хәҙер ашайым, йә тырнайым тип янай, оялары – кеше һыйырҙай. Ә ысынбарлыҡта ныҡ ҡурҡаҡ йәнлектәр. Саҡ ҡына уларҙы ҡурҡытырҙай хәл була ҡалһа, ҡаты һыҙғырып, ояларына инеп китәләр. Йыл да бер ғаиләне фотоға төшөрөргә тырышам, - тип һөйләй Станислав.

Байбаҡтарҙы һаҡлаусы "Бишбүләк" заказнигының майҙаны — 14,5 гектар. Республикалағы берҙән-бер был заказникка 1989 йылда нигеҙ һалынған. Әлеге мәлдә бында 600-ҙән ашыу байбаҡ һанала.

Был йәнлектәр "Ҡыҙыл китап"ҡа индерелгән. Тиреһе, ите, иң мөһиме, майы өсөн кеше уға һунар итә. Өлкән байбаҡ 8 – 10 килограмм ауырлыҡ йыя. Уның эске майы бурһыҡтыҡынан да файҙалыраҡ икән. Шуға байбаҡтар һаҡлауға мохтаж.

Ә һеҙҙең яҡта байбаҡтар бармы?

Станислав Шахов фотолары.