Зубрҙар һаны артасаҡ

Бөгөн Башҡортостан Башлығы Радий Хәбиров уҙғарған оператив кәңәшмәлә төбәк биләмәһендә белорус зубрҙары популяцияһын булдырыу мәсьәләһен тикшерҙеләр.

Башҡортостандың тәбиғәттән файҙаланыу һәм экология министры Нияз Фазылов 2023 йылдың майында “Мораҙым тарлауығы” тәбиғәт паркына тәүге туғыҙ баш зубрҙы алып килеүе хаҡында хәбәр итте. Ә ноябрь аҙағына тиклем популяцияны тағы ла туғыҙ башҡа арттырыу планлаштырыла. Хәтерегеҙгә төшөрәбеҙ, 2023 йылдың ғинуарында республика делегацияһының Беларусь Республикаһына сәфәре барышында Башҡортостан биләмәһендә зубрҙарҙың интродукциялау тураһында килешеүҙәргә өлгәшелде.

– Әле зубрҙар ирекле йөрөй. Улар йөрөгән урындарға ашамлыҡ ҡалдыралар һәм фототоҙаҡтар ҡуйғандар. Парк инспекторҙары көн һайын йәнлектәргә мониторинг үткәрә, уларҙың торошон ҡәнәғәтләнерлек тип баһалай, – тип һөйләне Нияз Фазылов. – Йәнлектәр үҙҙәрен һаҡ тота һәм ҙур булмаған хәүеф билдәләре булғанда ҡуйы урманда йәшеренә.

Министр әйтеүенсә, “Мораҙым тарлауығы” паркы ҡырағай хайуандарҙы урынлаштырыу өсөн юҡҡа һайланмаған, сөнки уның территорияһы дәүләт һағында тора. Бынан тыш, зубрҙар бында ҡышҡы аҙыҡ менән тәьмин ителәсәк. Был участканың үҙенсәлеге шунда – унда урман массивы ҡалын.

Нияз Фазылов, Рәсәй Фәндәр академияһы Өфө федераль тикшеренеү үҙәгенең Биология институты урман ерҙәренең сифатын һәм мал аҙығы һыйышлығын билдәләйәсәк, тип өҫтәне. Был урындағы флораға һәм фаунаға зыян килтермәйенсә парк биләмәһен һыйҙыра алған хайуандар һанын иҫәпләп сығарырға мөмкинлек бирәсәк.

Фото: "Башинформ".