Һауа торошо ныҡлы боҙола

Башҡортостан Республикаһының Ғәҙәттән тыш хәлдәр буйынса дәүләт комитеты 28 февралдә һауа торошоноң боҙолоуы хаҡында иҫкәртә. Ведомство Башгидромет синоптиктарының күҙаллауҙарына таяна.

Февралдең һуңғы көнөндә аяҙлы-болотло, яуым-төшөмһөҙ булыуы көтөлә. Ел йүнәлешен үҙгәртеүсән, секундына биш метр тиҙлектә иҫә. Юлдарҙың айырым участкаларында – боҙлауыҡ, төнгө һәм иртәнге ваҡытта томан була, күреү мөмкинлеге 500 метрға тиклем кәмей.

Һауа температураһы төндә -13, -18 градус тәшкил итәсәк. Урыны менән 20-25 градусҡаса һыуыта. Көндөҙ термометр бағанаһы -3, -8 градусҡа тиклем күтәреләсәк. Таулы райондарҙа һауа 2 градусҡаса йылына.

Өфөлә аяҙлы-болотло, яуым-төшөмһөҙ булыуы көтөлә. Ел йүнәлешен үҙгәртеүсән, секундына биш метр тиҙлектә иҫә. Һауа температураһы төнгө сәғәттәрҙә -20, -22, ҡала үҙәгендә -17 градус булыуы көтөлә. Көндөҙ -4, -6 градусҡаса йылыта.

Фото: Әлиә Хужәхмәтова.