+29 °С
Облачно
Ҡырағай мөхит
12 Мая , 19:40
Рөстәм Нәбиев бөгөн - тыуған көнөндә Эверестҡа артыла башлай
Кхумбу боҙлоғондағы юлда альпинистарҙың баш осонда хәүефле ҙур боҙ теле барлыҡҡа килеү арҡаһында быйыл донъяның иң бейек түбәһенә менеү бер аҙ кисектерелде. Боҙ теләһә ҡайһы ваҡытта шыуып төшөргә мөмкин. Урындағы халыҡ - шерптар - хәүефһеҙерәк маршрут төҙөгәс, сәйәхәтселәр улар артынан ҡуҙғаласаҡ тип күҙаллана. Улар араһында яҡташыбыҙ Рөстәм Нәбиев тә бар. Яңыраҡ ул 54 кислород баллоны алып, өс кешелек төркөм менән юлға йыйыныуын хәбәр итте.
Рөстәм Нәбиев бөгөн - тыуған көнөндә Эверестҡа артыла башлай
13 май - Рөстәмдең тыуған көнө. Уға 34 йәш тула.
Блогер апрель башынан Непалда, ул быйыл планетаның иң бейек түбәһе Эверестҡа (8848 метр) менергә ниәтләнә. Апрель буйына төрлө бейеклектәргә, лагерҙарға артылып, акклиматизация үткәс, 22 апрелдә 6476 метрлыҡ Мера Пикка менеп төштө.
Май башында Эверестҡа ҡарай йүнәлергә тейеш инеләр, ләкин боҙ шыуыу хәүефе булғас, властар тарафынан артылыш тыйылды һәм бер аҙ көтөргә ҡуштылар. Был ваҡытта йә боҙ теле үҙе шыуып төшөп юҡҡа сығасаҡ, йә ярҙамсы шерптар яңы, хәүефһеҙерәк маршрут төҙөй.
Һәм бына, һауа торошо уңай булғанда, Рөстәмдәр төркөмөнөң тап 13 майҙа юлға сығыры хәбәр ителде. Йәғни уның тыуған көнөндә.
Төркөмдәрендә өс кеше, барыһына 54 кислород баллоны. Түбәгә юл бөтәһе бер-ике тәүлек тирәһе ваҡытты ала. Ғәҙәттә, төн уртаһында юлға сығып, икенсе көндә төшкә менеп етәләр һәм шунда уҡ, төшкө сәғәт 2-ләрҙән дә ҡалмайынса, ҡараңғы төшмәҫ борон хәүефле юлды үтеп ҡалыр өсөн, кире әйләнәләр.
Эверест база лагерынан 21 километр алыҫлыҡта ята. Әммә был юл бик ауыр, вертикаль боҙ стеналар һәм шундай уҡ упҡындар аша үтергә тура киләсәк. Ҡар, боҙ ишелеүе лә бар.
Рөстәм Нәбиевкә уңыштар һәм һаулыҡ теләйек! Ул, Алла бирһә, Эверестҡа ҡулдарында менгән беренсе кеше буласаҡ.
Фото: Р. Нәбиевтең шәхси архивынан.