Ҡар яуа, боҙлауыҡ көтөлә

Башҡортостанда әбейҙәр сыуағы тамамлана. Был хаҡта Бащгидромет синоптиктары хәбәр итә. Уларҙың фаразы буйынса, октябрь башы һалҡын буласаҡ. Бының сәбәбе – төньяҡ Ҡаҙағстандан килгән арктик циклон.

Был эш аҙнаһының аҙағында һәм ял көндәрендә төнгө температура +1,-4, көндөҙ +2,+7 градусҡаса түбәнәйә. Һауаның уртаса тәүлек температураһы 0,+2 градус тәшкил итәсәк, был климат нормаһынан 5-7 градусҡа түбәнерәк.

Бынан тыш, синоптиктар ямғыр һәм ҡар рәүешендә яуым-төшөм фаразлай. Ҡайһы бер райондарҙа ваҡытлыса ҡар япмаһы барлыҡҡа киләсәк. Төндә һәм иртән юлдарҙа боҙлауыҡ көтөлә.

Киләһе аҙна башында циклон Башҡортостандан китә. Һауа торошо яйлап яҡшыра башлай.

Фото: Әлиә Хужәхмәтова.